Hjá PF Wenzel verða verkstøðini stongd hvønn fríggjadag eftir ársskiftið. Tað vil siga, at arbeiðsvikan verður stytt niður í fýra dagar heldur enn fimm sum hon er nú.
Á facebookvanganum sigur fyritøkan, at kanningar uttanlands vísa, at ein styttri arbeiðsvika gevur minni strongd og effektivari starvsfólk.
- Tí er hugsanin, at vit arbeiða færri tímar, men náa sama arbeiði. Tískil er vónin eisini, at hetta fer at geva viðskiftafólki okkara eina betri uppliving, tí starvsfólkini fáa enn størri yvirskot í arbeiðsdegnum. Vit vita, at samfelagshjólini mala skjótt, og at nógvar familjur liva hamstaralívið, har tað er trupult at fáa gerandisdagin at hanga saman.
- Leiðslan á Wenzel hevur tí avgjørt, at arbeiðsvikan á verkstøðunum frá 1. januar 2023 verður stytt niður í 4 dagar. Starvsfólkini fara sostatt at arbeiða 4 dagar og hava frí 3 dagar um vikuna, men við somu løn, verður sagt.
Um tú veitst okkurt, sum VP ikki veit - skriva so til vp@vp.fo
