Ísraelsk herfólk eru nú í hjartanum á Gaza býi, upplýsa talsfólk fyri ísraelska herin.

Tað hendir eftir at ógvuslig bumbuálop alla nátt hava verið á økið nærhendis al-Shifa sjúkrahúsinum, sum er tað størsta sjúkrahúsið í Gaza geiranum. Ísrael sigur, at Hamas hevur sína høvuðsstøð undir sjúkrahúsinum, ímeðan palestinsku myndugleikarnir, sum Hamas stýrir, siga, at tað passar ikki. 57.000 fólk skulu vera stúgvað saman á sjúkrahúsinum.

Seinasta samdøgrið hava tó verið tekin um, at fleiri vanlig fólk eru flýdd út gjøgnum eina geil, sum Ísrael heldur opna nakrar tímar um dagin.

Altjóða samfelagið hevur staðiliga heitt á partarnar um at halda vápnahvíld. Næsti sameindi hjá Ísrael, USA, hevur eisini heitt á Ísrael um at halda "humaniterar steðgir" ella "taktiskar steðgir" í álopunum. USA stúrir millum annað fyri vreiðini í arabiska heiminum, og at hon kann festa í eitt nógv meira umfatandi kríggj.

Ísraelar hava samstundis noktað, men Netanyahu forsætisráðharri hevur í óbindandi vendingum gloppa eini hurð fyri at hava stuttar steðgir í álopunum.