Fyrstu 9 mánaðirnir av árinum var úrslitið hjá BankNordik 246 mió kr fyri skatt. Harav koma 90 mió kr frá søluni av danska virkseminum.

Tað upplýsir bankin í morgun, nú úrslitið er kunngjørt.

Rakstrarúrslitið fyri niðurskrivingar gjørdist 127 mió. kr. samanborið við 110 mió. kr. sama tíðarskeið í fjør. Niðurskrivingar vórðu afturførdar fyri 36 mió. kr. samanborið við 5 mió. kr. í niðurskrivingum sama tíðarskeið í fjør. Rakstrarúrslitið gjørdist 163 mió. kr. samanborið við 106 mió. kr. sama tíðarskeið í fjør.

Og bankin hevði 7,6 mia. kr. í útlánum samanborið við 7,5 mia. kr. sama tíðarskeið í fjør. Sama tíðarskeið lækkaðu innlán bankans úr 7,5 mia. kr. til 7,4 mia. kr. Solvensurin hækkaði úr 24,9% sama tíðarskeið í fjør til 31,7%.

Bankin væntar, at nettoúrslitið fyri 2021 verður millum 230 og 250 mió. kr.

Árni Ellefsen, stjóri, sigur í viðmerking, at árið hevur roynst betur enn upprunaliga væntað.

- Arbeiðsloysið er lágt, eftirspurningurin eftir bústaðarfígging er stórur, og bæði vinna og privat húsarhald eru sum heild væl fyri. Í juli byrjaðu vit at bjóða viðskiftafólkunum eina samansparingarkontu uttan negativa rentu, og vit síggja, at alsamt fleiri velja at gagnnýta tann møguleikan, sigur Árni Ellefsen millum annað.