Atlantic Airways heldur fram at menna virksemið við støði í nýggju kósini, sum hevði við sær bíligari flogferðir, og har avgjørt var, at rutuflúgvingin skuldi raðfestast fremst, og at tann orka og tað pláss, sum leyp av rutuflúgvingini, skuldi brúkast til leiguflúgving fyri harvið at økja um lønsemið.

Nú tvey ár eru farin, síðani rutuflúgvingin varð skipað av nýggjum, har Danmarkar-ruturnar, NORÐ og SÓL vóru raðfestar fremst í virkseminum, hevur flogfelagið valt at taka eitt stig aftrat – hesa ferð innan leiguflúgving.

Atlantic Airways hevur undirskrivað fimm ára samstarvsavtalu við væl umtóktu, donsku ferðaskrivstovuna FolkeFerie.dk, sum fyrr var kend undir navninum Dansk FolkeFerie. Flogførini hjá Atlantic Airways fara at flúgva ferðafólk hjá FolkeFerie.dk til ymisk ferðamál sunnanfyri – fyrsta árið verður flogið til Malta, Madeira og Grikkalands.

- Avtalan er gott høvi hjá okkum miðvíst at skipa leiguflúgvingina, samstundis sum vit raðfesta rutuflúgvingina fremst í okkara virksemi við Føroyum sum snúningsdepli. Í avtaluni við FolkeFerie.dk leiga vit ein part av okkara yvirskotskapasiteti til væl umtóktu donsku ferðaskrivstovuna, sum er ein tryggur samstarvsfelagi við drúgvum royndum á baki, sigur Jóhanna á Bergi, stjóri í Atlantic Airways.

Hon vísir á, at tað hevur stóran týdning fyri flogfelagið at fáa inntøkur fyri yvirskotskapasitetin, uttan at tað nervar rutuflúgvingina, og tí eru ítøkiligar, longri leiguavtalur ein kærkomin møguleiki miðvíst at skipa leiguflúgvingina og fáa sum mest burtur úr flogkapasitetinum.

Rutuflúgvingin er skipað í føstum kørmum við alsamt hækkandi ferðafólkatølum. 30.000 fleiri ferðafólk flugu við Atlantic Airways í 2015 sammett við 2014, og tað svarar til eina vøkstur á 13 prosent. Higartil í ár hevur framgongdin verið átta prosent.

Framgongd er staðfest at kalla allastaðni á rutunetinum, og m.a. av hesi orsøk hevur Atlantic Airways valt at halda fram við trimum Airbus flogførum í flotanum. Tískil hevur flogfelagið endaliga slept ætlanunum um eitt minni flogfar til NORÐ-ruturnar. Avgerðin er grundað á eina heildarmeting, sum eitt nú eisini tekur støði í, at stundvísið, reglusemið og kundanøgdsemið eru økt munandi við Airbus flogførunum. Harumframt eru ábendingar um framhaldandi vøkstur komandi árini, og tørvurin á flogsetrum fer harvið at økjast.

- Vit hava staðfest, at tørvur er á trimum stórum flogførum fyri at veita eina nøktandi tænastu á rutunetinum, og sostatt hevur vøksturin á heimamarknaðinum havt við sær, at flogfelagið heldur fast um trý Airbus flogfør, sigur Jóhanna á Bergi, stjóri í Atlantic Airways.

Í fyrstu atløgu verður talan um tvey Airbus 319 og eitt Airbus 320, ið Atlantic Airways hevur keypt, og sum kemur í flotan í desember í ár. Airbus flogførini hóska væl til rutuflúgvingina við framkomnari RNP tøknifrøði, og harvið eru tey eisini áhugaverd hjá ferðaskrivstovum og øðrum at leiga frá føroyska flogfelagnum, tá pláss er fyri tí.

Tó at tørvur er á trimum flogførum, tá nógv rutuflúgving er í háárstíð, so er eisini avlopskapasitetur í skipanini - serstakliga í lágárstíð.

- Tað hevur stóran týdning fyri flogfelagið at fáa inntøkur fyri avlopskapasitetin, uttan at tað nervar rutuflúgvingina. Tí skipa vit leiguvirksemið miðvíst uttan fyri rutunetið, sigur Jóhanna á Bergi, stjóri.