Hví eru javnstøða og kyn viðkomandi at tosa um í sambandi við uppaling, dagstovnar, børn, frítíð, familjulív, barnsburðarfarloyvi, arbeiðsmarknað og lønarlag?

Hvat er tað sum ger, at menn í Føroyum forvinna 2/3, meðan kvinnur forvinna 1/3 av lønarútgjaldinum? Er tað ein so einføld forkláring, sum at menn arbeiða meira?

Hvat er arbeiði? Og hvat er ólønt arbeiði - alt tað arbeiði, sum vit ikki fáa løn fyri, men sum skal gerast?

Alt hetta og meira aftrat seta Almannamálaráðið og Javnstøðunevndin á skrá mikumorgunin 15. september 2021. Tá verður ráðstevna í Smæruni í Havn um arbeiðsmarknaðin og javnstøðu, har fakfólk og politikarar luttaka.

Endamálið við ráðstevnuni er at lýsa økið so væl sum til ber. Vónin er at finna fram til, hvussu vit - sum samfelag - kunnu tryggja best møguligu karmar fyri okkara børn og ungu at mennast, og fyri okkara familjur, borgarar og arbeiðsfólk at trívast.

Tiltakið mikudagin 15. september í Smæruni byrjar klokkan 8:30 við einum kaffimunni og endar klokkan 12.

Tríggjar framløgur verða um trý spennandi evni:

Ivonna Johansen, ph.d lesandi í barndómi og kyn og námslektari á Fróðskaparsetri Føroya, um børn, menning og javnstøðu.

Erika Hayfield, ph.d. og lektari á Fróðskaparsetri Føroya, fer at tosa um/perspektivera familjupolitikk, kyn og arbeiðsmarknað.

Kári Holm Johannesen, sosiologur og deildarleiðari á Hagstovuni, um arbeiðsmarknaðarhagtøl og kyn.

Eftir hvørja framløgu fara politikarar og fakfólk at kjakast um evnið.

Óluva Zachariasen verður orðstýrari.