Heilsutrygd hevur sett Anders Vedelsbøl í starv sum kommunulækna í Vága læknadømi.
Hetta boðar Vága Kommuna frá í dag á heimasíðu sínari.
Anders Vedelsbøl nam sær embætisprógv innan læknafrøði í 2006 og fekk serlæknagóðkenning í almennum medisini í 2012. Størsti parturin av serlæknaútbúgvingini varð tikin í Føroyum.
Hann hevur virkað sum kommunulækni í Keypmannahavn, umframt at hava røkt avloysarastørv sum kommunulækni í eitt nú Klaksvík, Tórshavn og á Sandoynni. Í 2015 virkaði hann sum deildarlækni í kriminalforsorgini í Keypmannahavn.
Seinastu tvey árini hevur Anders Vedelsbøl verið kommunulæknaavloysari í Vága læknadømi.
Anders Vedelsbøl tekur við starvinum í Vága læknadømi 1. mars 2018.
Um tú veitst okkurt, sum VP ikki veit - skriva so til vp@vp.fo
