![Hara 02](https://www.vp.fo/fileadmin/_processed_/1/1/csm_hara_02_455c94430f.jpg)
![Haruveida](https://www.vp.fo/fileadmin/_processed_/4/5/csm_haruveida_6a95ca22cd.png)
![Haruveida2](https://www.vp.fo/fileadmin/_processed_/7/9/csm_haruveida2_cf1609239d.png)
![GongdinIHaruveidiniI2023 8Mar2024](https://www.vp.fo/fileadmin/_processed_/a/1/csm_GongdinIHaruveidiniI2023_8Mar2024_c686d168a6.png)
![Hara 02](https://www.vp.fo/fileadmin/_processed_/1/1/csm_hara_02_455c94430f.jpg)
![Haruveida](https://www.vp.fo/fileadmin/_processed_/4/5/csm_haruveida_6a95ca22cd.png)
![Haruveida2](https://www.vp.fo/fileadmin/_processed_/7/9/csm_haruveida2_cf1609239d.png)
![GongdinIHaruveidiniI2023 8Mar2024](https://www.vp.fo/fileadmin/_processed_/a/1/csm_GongdinIHaruveidiniI2023_8Mar2024_c686d168a6.png)
Eyðfinn Magnussen, lívfrøðingur, sum seinastu nógvu árini hevur kanna føroysku haruna og haruveiðuna, hevur aftur latið úr hondum eina frágreiðing - “Haruveiðan í Føroyum 2023”.
Í 2023 var samlaða talið av skotnum harum í Føroyum 5.300 harur. Harurnar vórðu skotnar á 556 túrum í 234 høgum kring landið. Hetta er 24% færri harur enn í 2022, tá 6.578 harur vórðu skotnar í Føroyum.
Sørvingar raskastir
Raskastu at skjóta harur í Føroyum í 2023 vóru teir, ið skutu í “Norðurtriðingur – Sunnaripartur”, eisini nevndur “Vørðufelli” í Sørvági. Teir skutu 129 harur, sum teir fingu á 10 túrum. Teimum á baki vóru teir, ið skutu í “Norðurtriðingur – Norðaripartur” eisini nevndur “Norðurtriðingur - Uttanfyri Ánna”, eisini í Sørvági. Teir fingu 128 harur á 7 túrum. Á triðja plássi vóru teir, ið skutu í “Kirkjubøhaga - Fyri Heiman” í Kirkjubø.Teir fingu 123 harur á 3 túrum.
Flestu harurnar vórðu skotnar í Sørvági. Tilsamans skutu sørvingar 463 harur. Í Miðvági skutu teir 437 harur og í Vestmannai361 harur.
Triðingur av harunum skotnar í Streymoynni
Flest harurnar vórðu skotnar á Streymoynni, íalt 2.011 harur, sum er 38% av samlaða talinum av harum, sum vórðu skotnar í Føroyum í 2023. Í Vágum skutu teir 1.381 harur, í Eysturoynni 831 og á Borðoynni 361 harur.
Fyri alt landið vórðu skotnar 3,10 harur pr. byrsu hvønn dagin. Hetta er eitt sindur meira enn í 2022 tá teir í miðal skutu 2,74 harur pr. byrsu hvønn dagin, men minni enn í 2021, tá miðaltalið var 3,33.
Á teimum 556 harutúrunum, sum vórðu gjørdir í 2023, var veiðan millum 0 og 74 harur hvønn túrin. Vanligast var tó at fáa 1 til 4 harur á einum túri. Í miðal vórðu skotnar 8,79 harur á hvørjum túri í 2023. Hetta er eitt vet lægri enn 2022, tá miðalveiðan fyri hvønn túrin var 10,13 harur, men eitt sindur meira enn í 2021, tá miðalveiðan var 8,58 harur á hvørjum túri.
Um tú veitst okkurt, sum VP ikki veit - skriva so til vp@vp.fo