Útnorðurráðið: Útnorðurráðið heldur í hesum døgum 40. ársfund ráðsins í Tórshavn. Á ársfundinum, ið var settur í Norðurlandahúsinum týsmorgunin, hittast fólkavaldu limirnir í ráðnum.

Ráðið er mannað av 6 tinglimum úr hvørjum landi í útnorðri, Grønlandi, Føroyum og Íslandi. Harumframt luttaka politikarar og gestir úr hinum Norðurlondunum.

Á fundinum umrøður ráðið viðurskifti av áhuga fyri londini í útnorðri. Á skrá fyri ársfundin hesa ferð eru evnini sivil tilbúgving í útnorðri og mál í útnorðri í einum talgildum heimi á skránni. Harumframt viðgerð ráðið onnur viðkomandi evni, herímillum altjóða samstarv.

Eisini verður Barna- og ungdómsbókmentavirðisløn Útnorðurráðsins handað í sambandi við ársfundin.

Virðislønin verður latin á øðrum hvørjum ári, og í ár eru útvaldu bøkurnar Flytifuglar eftir Elina á Rógvi, Eli aalisagarsuarlu eftir Apollus Inûsugtok (GL) og Héragerði eftir Lóu H. Hjálmtýsdóttir (IS). Virðislønin verður handað hósdagin 29. august kl. 17 á almennum tiltakið í Norðurlandahúsinum.

Grønland tekur við formanssætinum í formansskapinum fyri komandi árið. Nýggjur formaður verður Doris J. Jensen, Steinunn Tóra Árnadóttir verður 1. næstformaður og verandi formaður, Jenis av Rana, verður 2. næstformaður.