FSF: – Tað ræður alla tíðina um at seta nýggjar dómarar við, og tað var tískil hugaligt at síggja, at hesi skeiðini fingu so góða undirtøku. Men vit hava ongantíð nokk av dómarum, so vónandi leggjast fleiri afturat, sigur Lassin Isaksen, dómaraleiðari hjá Fótbóltssambandi Føroya.

Tilsamans 19 luttakarar vóru á báðum skeiðunum, tá FSF fyri viku síðani skipaði fyri FSF C- og FSF B-dómaraskeiðum. Níggju dómarar fingu FSF C-dómaraprógv, og tíggju fingu FSF B-dómaraprógv.

Á FSF C-dómaraskeiðnum verður serligur dentur lagdur á millum annað venjingar, video, lógarbroytingar, umframt onnur viðurskifti, meðan tað á FSF B-dómaraskeiðnum verður serligur dentur lagdur á leiðslu, klandursstøður, plasering og annað.

– Kappingin higartil í ár hevur gingið væl, og teir nýggju dómararnir, sum eru komnir til seinastu árini, hava gjørt eitt gott arbeiði, sigur Lassin Isaksen við heimasíðuna hjá FSF.

Luttakararnir á FSF B-dómaraskeiðnum vóru hesi: Ronni Garnddal, Heini Poulsen Hellisdal, Súni Fríði Johansson Hansen, Nicusor-Christian Matica, Arthur Højgaard, Annfinn Hjaltalin, Benjamin Grønagarð, Leivur Tikhekari Willumsen, Edvard Djurhuus og Benjamin Erlandsson Tvørfoss (manglar á myndini).

Luttakararnir á FSF C-dómaraskeiðnum vótu hesi: Gunnar Eihilt Sivertsen, Høgni Louisson Poulsen, Høgni Madsen, Sverri Sólheim Ellingsgaard, Jóhann Eliasen, Rói Reinert Hansen, Marius Dam Vang, Otto Dam Vang, Hannis Dalheim Rasmussen og Annika Eliasen Breiðaskarð.