Dimmalætting fer undir at gera 20 podvarp, har vertirnir eru Øssur Winthereig, sum er verkætlanarleiðari, og Brynhild Thomsen.

Tað vísir ein partur av innlitinum sum VP hevur fingið í sambandi við seinasta útgjald frá Miðlastuðulsnevndini til verkætlanir.

Knarri hjá Dimmalætting fekk yvir 240.000 krónur í stuðli.

Sum lýsing av Knarrinum, sigur Dimmalætting, at "í sendingini verða krøv sett til journalistikkin. Lagið er gott men støðið er høgt."

- Málið er eisini, at føroyingurin skal fáa innlit í, hvussu journalistikkurin verður framdur í konkretum málum, sum eru frammi. Harafturat er málið at hvessa krøvini til ordiligan journalistikk, og ikki minst at eggja til fjølbroytni í journalistikkinum, sum er í Føroyum. Málbólkurin er tann kræsni lurtarin. Tann, sum vil hava meira og setur krøv til tað, sum verður leverað. Lurtarin er eisini ein, sum engagerar seg í samfelagnum og fylgir við, verður sagt.

- Pressan, sum er seinasta miðlasendingin, sum var í Føroyum, varð varpað í Kringvarpinum, men ynski hevur verið um at gjørt eina líknandi sendin í privatum miðli. Øssur Wintherheig, sum hevði pressuna og verður leiðari fyri hesari sendingini, vendi sær tí til okkum, og vit hava í samstarvi ment Knarrið, sigur Dimmalætting.