Meðan samgongusamráðingarnar ímillum CEF-flokkarnar og Miðflokkin eftir øllum at døma halda fram, hava samgongutinglimir, ella tinglimir, sum stuðla samgonguni, hesar síðstu tveir dagarnar verið neiligir yvirfyri, ella undrast á ætlanina, hjá samgonguni at fáa Miðflokkin uppí (eina nýggja samgongu). 

Fyrst var tað Sonja Jógvansdóttir, sum tók frástøðu frá samráðingunum við Miðflokkin. Hetta gjørdi hon á Facebook. Sonja tók seg úr Javnaðarflokkinum eftir løgtingsvalið í 2015, men hevur stuðlað samgonguni síðan tá. Hon segði sunnudagin, at...

- Eri ikki boðin við og gott tað sama. Tí at lata Miðflokkin aftur sleppa at seta dagskránna í føroyskum politikki er burturúr vón og viti.

Síðan var tað Kristin Michelsen, tingmaður hjá Javnaðarflokkinum, sum undraðist. Kristin segði sunnukvøldið við VP, at...

- Samgongan vil ikki samráðast um 1-2 punkt hjá okkum, sum vit eru ósamdir um, men um eini 20 punkt hjá Miðflokkinum. Tað undrar meg og eg standi spyrjandi.

Og nú í dag rópar eisini Páll á Reynatúgvu úr Tjóðveldi varskó á Facebook vanga sínum:

- Má bara siga sum er! At fáa Miðflokkin inn í samgonguna hóvar mær illa. Virðisgrundarlagið sampakkar ikki við politikkin hjá hesi samgonguni og hesum samgonguflokkunum. Leggið handan bóltin deyðan og roynið loysnina innanveggja. Alt ber ikki til í politikki!

Sostatt er greitt, at ikki øll í núverandi samgongu eru so glað fyri samgongusamráðingarnar við Miðflokkin. Spurningurin, sum stendur eftir, er, um hetta er nóg mikið til at fáa samráðingarnar at detta niðurfyri.