Í dag var so sjøtil settur á seinnu leikhálvu í landskappingini í talvi fyri lið. Dystirnir í sætta umfari í dag áttu av røttum at verið avgreiddir fyri tveimum vikum síðani, men vórðu útsettir vegna korona.

Við stórsigri 3½-½ á kollfirðingum løgdu sandavágsmenn bragdliga fyri í tí nýggja árinum. Sum vant fullmannaðir, einki avboð á nøkrum borði. Brøðurnir Rógvi og Høgni Egilstoft Nielsen og Silas Eyðsteinsson vunnu á fremstu trimum borðunum á Kára Petersen, Bernhard Thomsen og Hanus Joensen. Á fjórða borði mátti Torkil Nielsen sættast við remis móti tí unga Rógva Mørkøre.

Eftir ruddiliga sigurin hjá Havnar Telvingarfelag á Sandavágs Talvfelag í toppdystinum í 1. deild fyri jól, varð spenningur kyknaður upp av nýggjum. Niðurstøðan hjá havnarmonnum var, at nú ráddi um ikki at slaka í komandi dystum móti veikari mótstøðuliðum. Men í dag spøkti gamla syndin aftur hjá føroyameistarunum. Uttan at manna seg við øllum sínum bestu telvarum stóð á at vinna á felagsins B-liði. Hvørki Helgi Dam Ziska, Martin Poulsen ella Carl Eli Samuelsen, sum vóru við í toppdystinum fyri jól, telvaðu í dag.

Føroyameistarnir vunnu tepurt 2½-1½ á øðrum liði hjá havnarmonnum. Eingin orsøk er hjá FM-manningini at undirmeta uppgávuna, tí í fleiri av undanfarnu dystunum innanhýsis millum liðini hjá Havnar Telvingarfelag í fremstu deildini, hevur gingið javnt á, tó at A-liðið, sum vera man, hevur sterkari telvarar á hvørjum borði.

Hart brøðrastríð á fyrsta borði endaði javnt. Olaf Berg mátti heldur nipin sættast við remis móti lítlabeiggjanum Margari, hóast eini 300 ratingstig eru á muni. Á øðrum borði var Luitjen Akselsson Apol við undirlutan móti Suna Merkistein. Her vóru eisini eini 300 ratingstig á muni, men tann ungi gávaði Luitjen hevði ikki eydnuna við sær í hesum talvinum. Á aftaru borðunum gjørdu Sjúrður Thorsteinsson og Herluf Hansen sína skyldu við at vinna á Arnbirni Dalsgarð og Óla Joensen.

Havnar Telvingarfelag tók annars nýggju felagshølini í ovastu hædd í Finsen - gamla Kommunuskúlanum - í nýtslu í dag. Gamla felagshúsið í R.C. Effersøesgøtu er selt. Í nøkur ár hevur felagið húsast í Ytra Skúla við Landavegin - á mannamunni nevndur Guli Skúli - men nú er eitt nýtt tíðarskeið byrjað í gomlu sangstovuni ovast í Finsen. Har eru góðar umstøður at telva.

Eins og í Havn var innanhýsis dystur á skránni í Skákinum í Klaksvík. Klaksvíkingar hava eins og havnarmenn tvey lið í bestu deildini. Her gjørdi A-liðið bart og vann heili 3½-½, hóast munurin í styrkitølum er væl minni á liðunum í Klaksvík enn í Havn. Ólavur Simonsen, Rani Nolsøe og Teri Petersen vunnu á Finnbjørn Vang, Rana Baldursson og Ingolf Gaard. Einasti javnleikurin var á triðja borði millum Steintór Rasmussen og Haldur Suna Johansen.

6 umfar

Kollafjørður-Sandavágur ½-3½

Havnin B - Havnin A 1½-2½

Klaksvík B - Klaksvík A ½-3½

Støðan 1. deild:

Sandavágur 16½ stig

Havnin A 15

Klaksvík A 12

Klaksvík B 10

Havnin B 9½

Kollafjørður 9

Vestmanna á odda

Í 2. deild er Vestmanna Talvfelag á odda og hevur kós móti uppflyting. Í dag vunnu vestmenningar 3-1 á Runavíkar Talvfelag. Á vestmannaliðnum telvaðu Samson Højgaard, Jákup á Rógvi Andreasen, Martin Brekká og Alfred Olsen.

6 umfar

Runavík-Vestmanna 1-3

Klaksvík-Kollafjørður 2-2

Havnin-Sandavágur 1½-2½

Støðan í 2. deild

Vestmanna 18½

Klaksvík 13

Kollafjørður 12½

Sandavágur 11½

Havnin 10½

Runavík 6

Triðja deild í tvíningum

Nýggj skipan í 3. deild ber í sær, at tey tólv liðini eru flokkað í tvær deildir eftir at innleiðandi kappingin fyri ársskiftið er avgreidd. Fremru liðini eru komin í deild A, tey aftaru í deild B.

3 deild (A) støðan

Rókur A 4

Vestmanna 2½

Kollafjørður 2

Toftir 2

Sandavágur 1½

Rókur B 0

3 deild (B) støðan

Havnin 4

Gøta 2

Runavík 2

Sandavágur 2

Klaksvík 2

Havnin B 0

Nýggj unglingadeild

Eftir steðg í nøkur ár er unglingadeildin endurstovnað. Seks lið kappast. Higartil hava seks umfør verið. Havnardreingir eru í løtuni á odda.

Unglingar (støðan)

Havnin 20½

Klaksvík A 18½

Klaksvík B 13

Kollafjørður 11

Sandavágur A 7½

Sandavágur B 1½

Meira kann lesast um liðkappingina á heimasíðu Talvsambandsins: faroechess.com.

Telvað verður aftur í landskappingini um tvær vikur. Dystirnir í 1. deild í sjeynda umfari 7. februar eru hesir: Havnin B - Sandavágur, Havnin A - Klaksvík B og Klaksvík A - Kollafjørður.