Heimurin heldur ondini, eftir at Ísrael síðstu nátt framdi umfatandi álop á Hizbollah mál í Beirut.
Loftálopið var so umfatandi og ógvusligt, at tað risti allan býin, og minst 300 fólk skulu hava latið lív - sambært Ísrael alt fólk frá iranskt stuðlaða Hizbollah yvirgangsfelagsskapinum, sum síðani Hamas álopið á Ísrael í fjør áhaldandi hevur skotið rakettir inn í Ísrael, sum tískil hevur verið noytt at vart seg á tveimum hermótum.
Í talu síni til ST aðalfundin í gjár nevndi ísraelski forsætisráðharrin, Benjamin Netanyahu ikki einaferð orðið vápnahvíld. Hann segði tvørtur ímóti, at Ísrael fer at halda fram við álopunum á Hizbollah.
Í Iran kallaði ovasti leiðarin, ayatollah Ali Khamenei í gjár sítt trygdarráð saman á skundfund. Iranski forsetin, Masoud Pezeshkian, kallaði ísraelska álopið fyri eitt krígsbrotsverk og lovaði, at Iran fer at standa saman við libanesarum.
Nær kemur næsti leikur - og hvør verður hann, spyr heimurin.
Um tú veitst okkurt, sum VP ikki veit - skriva so til vp@vp.fo
