![Rasmus Drangarnir](https://www.vp.fo/fileadmin/_processed_/f/a/csm_Rasmus_Drangarnir_854244a30b.jpg)
![Rasmus Drangarnir](https://www.vp.fo/fileadmin/_processed_/f/a/csm_Rasmus_Drangarnir_854244a30b.jpg)
Samstarvsnevndin fyri Visit Vágar hevur gjørt av at seta Rasmus S. Biskopstø í farloyvisstarv sum menningarleiðari fyri Visit Vágar.
Rasmus er 28 ára gamal, hevur eina bachelorútbúgving í sosialvísund og samfelagsplanlegging og eina kandidatútbúgving í geografi og sosialvísund. Hann hevur skrivað serritgerð um vaksandi hiking-ferðavinnuna í Føroyum, har umstøðurnar við Drangarnar og Trælanípuna vóru millum økini ið kannað vóru.
Rasmus hevur arbeiðsroyndir m.a. sum býarplanleggari og innan ferðavinnu. Hann er í skrivandi løtu kunningarleiðari hjá Visit Suðuroy á Tvøroyri.
Rasmus byrjar í starvinum sum menningarleiðari hin 1. mai 2021.
7 umsóknir vóru til starvið, og samstarvsnevndin var samd um, at Rasmus hevði rætta profilin og røttu førleikarnar at røkja farloyvisstarvið, ið næsta árið fyrst og fremst fer at snúgva seg um menning av ferðavinnuinfrakervinum í Vágum og Mykinesi. Samstarvsnevndin er sett saman av umboðum fyri Sørvágs kommunu og Vága kommunu.
Kommunurnar í Vágum ynskja Rasmusi til lukku og góða eydnu við starvinum.
Um tú veitst okkurt, sum VP ikki veit - skriva so til vp@vp.fo