Fróðskaparsetrið: Gransking vísir, at í heilsufótbólti er sambandið so mikið lítið millum spælararnar, at smittuvandin av koronu er lítil.

Nýggj vísindalig grein í tíðarritinum, "BMJ Open" hevur heitið, "Danger zone assessment in small-sided recreational football: providing data for consideration in relation to COVID-19 transmission". Í henni verður greinað, hvussu leingi og hvussu ofta vanlig fólk, sum spæla heilsufótbólt, eru í vandastøðum (Danger Zone; DZ), tá talan er um koronusmittu.

Verkætlanin er samstarv millum Magna Mohr, professara á Fróðskparsetrinum, og danskar og serbiskar granskarar. 

GPS-dátur frá eldri heilsufóltbóltsverkætlanum eru greinaðar, og staðfest er, hvussu leingi fótbóltsspælarar eru í vandaøkinum, tá teir spæla heilsufótbólt. Vandaøkið er lýst sum ein radius uppá hálvanannan metur frá einum møguliga smittaðum viðleikara.

Heilsufótbóltur er ikki kontaktítrótt
Høvuðsúrslitini vísa, at í ymiskum fótbóltssmáspølum er tann einstaki leikarin í smittuvandaøkinum í 34-115 sekund um tíman, og harumframt er tíðarbilið, har viðkomandi er í smittuvandaøkinum, minni enn tvey sekund 80 prosent av tíðini.

Tískil er heilsufótbóltur ikki kontaktítrótt, men ein venjingarháttur við stuttum og sporadiskum sambandi millum leikararnar. Sostatt verður mett, at heilsufótbóltsspæl er ein tryggur kropsligur venjingarháttur, tá tað snýr seg um covid-19-smittu.

Neilig árin av óvirkni
Kanningarúrslitini geva heilsumynduleikum í Føroyum og uttanlands møguleika at viga vandan av fótbóltsspæli upp ímóti teimum neiligu kropsligu, sosialu og sálarligu árinunum av at steðga barna-, ungdóms- og heilsfóltbóltsspæli í koronutíðini, sum vit eru í.

- 30 prosent av heimsins borgarum røra seg minni enn tey minstu mørkini, ið sett eru, og undir koronukreppuni er støðan við kropsligum óvirkni bara versnað um allan heim.

- Samstundis er staðfest, at kropsligt virkni fyribyrgir og eigur at vera partur av viðgerðini av 26 varandi sjúkum, og tí mugu avgerðir at steðga ítróttarvirksemi byggjast á granskingarúrslit heldur enn magakenslur, sigur Magni Mohr, professari í arbeiðs- og ítróttarfysiologi.

Hann leggur aftrat, at fótbóltur er heimsins størsta ítróttargrein við umleið 250 milliónum virknum spælarum.

- Spælið hevur tí ómetaliga stóra jaliga ávirkan á alheims fólkaheilsuna, og tí gevur okkara nýggja grein mynduleikunum vísindaliga próvførslu, tá tað ræður um koronusmittuvanda, sigur Magni Mohr.

Greinin kann lesast her.