Bæði Frakland og Stórabretland fordøma umfatandi loftálopið á Ukraina í dag, sum skal hava rakt millum annað eitt barnasjúkrahús.
Bretski uttanríkisráðharrin, David Lammy, kallar álopið á sjúkrahúsið fyri "eitt skakandi álop á ukrainsk sivilfólk".
- Stuðulin hjá Bretlandi til Ukraina er óvikiligur. Tey, sum hava ábyrgdina av hesum ólógliga stríðnum, skulu standa til svars, sigur Lammy.
Frakland reagerar eisini harðliga og kallar álopið fyri "barbariskt".
- Hesi barbarisku álopini, sum tilvitað rætta seg móti einum barnasjúkrahúsi, kunnu leggjast afturat listanum yvir krígsbrotsverk, sum Russland skal svara fyri, stendur í fráboðan frá franska uttanríkisráðnum.
Í minsta lagi 20 fólk eru deyð og umleið 50 eru særd í loftálopinum á minst fimm ukrainskar býir, teirra millum høvuðsstaðin Kyiv, skrivar norska TV 2.
Um tú veitst okkurt, sum VP ikki veit - skriva so til vp@vp.fo
