Glasir: Ungt Virki er eitt tilboð til allar miðnámsskúlanæmingar í aldrinum 15-25 ár, sum ynskja at læra, hvussu tey kunnu menna nýggjar vørur og tænastur frá hugskoti til veruleika og hvussu tey fáa hesar út á marknaðin.

Í ár luttaka heili 26 bólkar við tilsamans 100 næmingum, sum koma frá Tekniska Skúla í Klaksvík, Miðnám á Kambsdali og Glasi í Tórshavn. Tey ungu hava síðani august fingið undirvísing í nýskapan og íverksetan og hava m.a. lært at menna nýggjar vørur og tænastur. Harafturat hava tey fingið royndir í, hvat skal til fyri at stovna og reka egna fyritøku.

Í nógv ár hevur tiltakið verið hildið á Torginum í SMS og tað hevur roynst stak væl. Í ár er avgerð tó tikin um at royna nakað nýtt, tí í ár verður tiltakið fyri fyrstu ferð hildið á Glasi. Tiltakið byrjar kl. 9.30 og endar kl. 16, tá vinnarin verður kosin.

FM-vinnarin umboðar Føroyar í finaluumfarinum í Keypmannahavn síðst í apríl, har tey 42 bestu liðini úr Kongaríkinum fara at dystast um besta hugskotið.

Ungt Virki skipar á hvørjum ári fyri íverksetaratiltøkum á føroysku miðnámsskúlunum í samstarvi við m.a Mentamálaráðið, Vinnumálaráðið, Betri, Vinnuhúsið, Íverksetarahúsið, Hugskotið, Fróðskaparsetrið, SMS, vinnulívið og miðnámsskúlar.

Næmingarnir hava fingið ráðgeving frá Betri, Íverksetarahúsinum og Hugskotinum, og hava harumframt fingið fíggjarligan stuðul frá Betri.

Tað verða 7 dómarar úr føroyska vinnulívinum, sum koma at meta um hugskotini og geva bólkunum afturmeldingar um teirra hugskot og framløgur.

Menna næmingar til framtíðar størv
Kanningar vísa, at næmingar, sum fáa undirvísing í nýskapan og íverksetan gleðast um at ganga í skúla og seta sær hægri mál fyri útbúgving og yrkisleið.

Harumframt kenna tey, at tey hava nakað at geva samfelagnum, og tey eru bjartskygdari um framtíðina.

Tey menna fakligar, persónligar og sosialar førleikar, ið eru neyðugir fyri at megna framtíðar størv bæði sum íverksetar, leiðarar og starvsfólk.