Søgan um nýgerð av Húsarhaldsskúla Føroya hevur verið long og drúgv. Nú vit eru komin inn um teoretisku mállinjuna‚ og verkætlanin skal setast í verk í næstum‚ so er tað bert ein forholdsvís lítil upphædd‚ ið manglar á fíggjarlógini‚ ið landsins leiðsla skal finna‚ so fer verkætlanin í gongd.
Vit kunnu sjálvandi øll vera samd ella ósamd um staðseting‚ snið og innihald í Húsarhaldsskúlanum‚ men nú er ikki tíðin til kjak um staðseting av hesum týdningarmikla mentanarvarða.
Vit vilja tí heita á landsins leiðslu‚ um at avgreiða fíggjarliga partin‚ so stóra og drúgva arbeiðið‚ ið longu er gjørt verður staðfest‚ og verkætlanin sett í verk sum skjótast.
Klaksvíkar býráð hevur ongar viðmerkingar ella ynski um broytingar til verandi verkætlan. Býráðið er liðugt at viðgera málið‚ og vil við hesum gera tað púra greitt fyri landsins leiðslu og borgarum annars‚ at tað er ikki av lokalu myndugleikunum í Klaksvík‚ at verkætlanin verður skotin út í óvissu.
Vit meta tað alneyðugt at koma við hesi útmeldin‚ so landsstýrið og løgtingið kann hugsavna seg um at avgreiða síðsta fíggjarliga partin‚ so verkætlanin fer í gongd skjótast gjørligt‚ sum hon er samtykt.
Vegna Klaksvíkar býráð
Karl Johansen
Gunvá við Keldu
Jóhanna Christiansen
Annika S. Biskopstø
Jógvan Skorheim
Signhild Johannesen
Tummas Lervig
Óli M. Lassen
Eyðstein Ó. Poulsen
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo
