Ólavsøkusvimjing á sjónum. Svomið verður beint aftaná kappróðurin frá rampuni ytst á Molanum og inn í Krókin við Havnarskrivstovuna. Teinurin, ið svomin verður, er 400 metrar.

ÓLAVSØKUSVIMJING 28. JULI 2024 AFTANÁ KAPPRÓÐURIN

NÝTT:  Í ár fáa allir svimjarar, ið koma á mál, heiðursmerki fyri luttøku.

Tilmelding
Tilmelding til svimjingina á ólavsøku fer fram í seinasta lagi 26. juli við at flyta kr. 300 á kontu hjá Havnar Svimjifelag 9181-374.480.0. Viðmerk NAVN á svimjara og FØÐIÁR. Vit skulu brúka føðiárið til at bólkabýta úrslitið.

Kunningarfundur um trygd, atgongumerki og svimjihettu
Í Svimjihøllini í Gundadali 27/7 kl. 20.30 verður kunning. Talmerkt hetta og atgongumerki, ið gevur atgongd til kappróðrarøkið, verða latin tilmeldaðum luttakarum. (Um høvuðsinngongdin er stongd, farið so inn gjøgnum síðudyrnar).

Atgongd til kappróðrarøkið og skiftiumstøður
Atgongumerkið gevur atgongd inn á kappróðrarøkið umvegis rundkoyringina við Skansan. Tað eru bara vaktir við hesa inngongd, ið eru vitandi um og taka ímóti okkara atgongumerki.

Til ber at skifta í hølum hjá Skipafelagnum (pakkhús) frá kl. 16. Tá ið svimjingin er liðug, sleppa vit at spula draktirnar har. Vaktir vera við hurðina til tiltakið er liðugt, so klæðini eru trygg og vit sleppa altíð inn.

Kapping
Kappingin er skipað í seks bólkar:

• Kvinnur 24 ár og yngri

• Kvinnur Masters 25-49

• Kvinnur Masters 50 ár og eldri

• Menn 24 ár og yngri

• Menn Masters 25-49

• Menn Masters 50 ár og eldri

Hóast svimjingin verður bólkað sum kapping, so verður dentur lagdur á, at hetta er eitt tiltak fyri øll, ið duga og dáma at svimja – um tað er fyri at kappast ella ei. Høvuðsendamálið er at luttaka, at røkka málinum og fáa eitt gott upplivilsi á sjónum. Og sum nakað nýtt, so fáa øll, ið koma á mál í ár, heiðursmerki fyri luttøku.

Svimjingin
Svomið verður beint aftaná kappróðurin frá rampuni ytst á Molanum og inn í Krókin við Havnarskrivstovuna. Teinurin, ið svomin verður, er 400 metrar.

Svimjarar skulu ganga út á endan á Molanum og vera har í seinasta lagi tá ið triðseinasti róður byrjar. Svimjarar skulu allir vera í talmektu hettuni, ið teir fáa útflýggjaða.

Startað verður í sjónum. Málið er allur bryggjukanturin í Krókinum (tann, sum skipini bakka ímóti). Nert við betongið. Rópa navnið og royn og gev teg til kennar við at hyggja upp, so vit fáa andlitið á video.
50 og 100m merkir eru á keikantinum allan vegin.

Trygd og ábyrgd
Lækni, sjúkrasystrar og hjálparfólk eru á landi og í bátum. Tey eru í HS eyðkennisvestum. Bátar tryggja, at óviðkomandi bátar verða hildnir vekk.

Hóast vit seta trygdina í hásæti, so eru viðurskiftir á sjónum, ið vit ikki fáa stýrt, og sum kunnu vera vandamikil. T.d. kemur fyri, at bátar sigla skjótari enn loyvt er og harvið gera stórar aldur. Neyðugt er tí, at hvør einstakur syrgir fyri at hava nóg stóra frástøðu til keiina. Umráðandi er, í heila tikið, at vera umhugsin á sjónum.

GG! HEVUR TÚ TØRV Á HJÁLP, SO SIGNALERAR TÚ HETTA VIÐ AT LEGGJA TEG Á RYGGIN OG VEIPA VIÐ ØRMUNUM!

Tá tú velur at luttaka, so gert tú tað undir egnari ábyrgd. Fært tú skaða í hesum sambandi, so taka vit sostatt ikki ábyrgd av skaðanum.

Heiðursmerkjahandan og annað
Heiðursmerkir verða handað, so skjótt sum úrslitið fyriliggur. Tá verða eisini øl, vatn og okkurt sterkari.

Ólavsøkusvimjingin úr einum søguligum sjónarhorni
Við ólavsøkusvimjingini í 2010 tók Havnar Svimjifelag upp aftur gamla siðvenju. Fyrstu ferð fyriskipað kappsvimjing var á sjónum á ólavsøku var í 1912. Fram til 1934, tá ið fyrsti hylurin í Gundadali stóð liðugur, varð av og á svomið kapp á sjónum á ólavsøku. Tá ið hesin fyrsti hylurin varð niðurlagdur í 1949 og fram til 1959, tá ið nýggi hylurin í Gundadali stóð liðugur, hevði Havnin ongan hyl. Í 1951 varð tí aftur farið á sjógv at svimja kapp. Seinastu ferð, áðrenn 2010, fyriskipað kappsvimjing var á sjónumn á ólavsøku var á Vestaru Vág í 1954.

HAVNAR SVIMJIFELAG
#ólavsøkusvimjing2024