Fyrr í dag boðað privata kanningarstovan Thetis frá, at tey lata upp kanningarstovu í Vágum.

Les eisini: Thetis letur upp kanningarstovu í Vágum

Og nú boða kommunurnar í Vágum frá, at tær eisini ætla at kanna vágafólk fyri korona.

Kommunurnar bera í fyrsta umfari sjálvar kostnaðin fyri kanningarnar, verður sagt.

- Eftir góðu royndirnar sunnumorgunin, tá umleið 500 fólk lótu seg kanna á brandstøðini á keiini, varð mett at stórur tørvur er á eini kanningarstøð í Vágum. Tí hevur verið arbeitt við málinum við eini kanningarstøð, har kannað verður nakrar ferðir um vikuna í eitt tíðarskeið. Fyribils verður eftir ætlan kannað tríggjar ferðir um vikuna í tríggjar vikur, men við tí fyrivarni at støðan kann broytast.

Eins og sunnudagin verður einvegis ferðsla við omankoyring frá Giljanesi, og av keiøkinum verður útkoyring móti Miðvági.

- Vónandi fer hetta at lætta um hjá okkara borgarum, so ikki verður neyðugt at brúka nógva orku og tíð hjá teimum at fara til Havnar ella aðrastaðni í landinum, fyri at lata seg kanna seg fyri Covid-19, sigur Bjarni Prior, borgarstjóri í Vága kommunu.

Boða verður frá tá klárt er at bíleggja tíð til kanning, siga kommunurnar.