Seks frystilínuskip fiska undir Føroyum. Bara eitt ísfiskalínuskip er til fiskarí, men vantandi fer onkur út um vikuskiftið. - Vit rokna við at okkurt av skipunum fer at landa seinni í vikuni, sigur Fiskamarknaður Føroya í síni meting fyri vikuna sum kemur.

Viðvíkjandi útróðri verður sagt, at streymurin harðnar sum vikan gongur, men veðrið verður gott, so helst verður nakað av útróðri, hóast fiskaríið er smáligt.

Ein djúpvatnstrolari er á svartkalvaveiðu og kemur vantandi at landa fyrst í vikuni.  Ein liggur við bryggju og ein frystitrolari fiskar svartkalva í Eysturgrønlandi.

Fimm pør eru til fiskarí og koma tey flestu at landa í vikuni. Fýra pør fiska upsa, men fáa eisini nakað av hvítum fiski. Tað fimta parið fiskar svartkalva. Tvey pør fiska gulllaks.

Ein trolbátur er á landleiðini, ein er á Skeivabanka, ein er á Íslandsrygginum og so eru tveir norðanfyri. Allir landa í vikuni. Tað er ein blandingur av toski, hýsu og flatfiski bátarnir fáa.

Tvey garnaskip fiska svartkalva, og fiskaríið er brúkiligt. Tvey fiska havtasku, har er misjavnt fiskarí. Øll garnaskipini landa í vikuni, sigur Fiskamarknaður Føroya í síni meting fyri næstu vikuna.