Lionel Messi skeyt sítt mál nummar 789 í sínum dysti nummar 1.000 í kvøld. 

Og Julián Álvarez vísti, hví tað var rætt av Lionel Scaloni at byrja við honum og vraka Lautaro Martinez.

Matthew Ryan kom í óføri tíðliga í seinna hálvleiki, og Álvarez var ísakaldur og revsaði avstralska málverjan fyri mistakið.

Avstralia minkaði um munin til 2-1 í 77. minutti, og eftir hetta vóru møguleikar til bæði liðini. 

Lautaro Martinez brendi tveir risamøguleikar, Matthew Ryan gjørdi tvær fínar bjargingar, og í hinum endanum mundi Aziz Behich gjørt ein "Maradona", men Lisandro Martinez úr Manchester United fekk vart fyri við eini góðari takling í evstu løtu. 

Í yvirtíðini var aftur vandi á ferð í argentinska brotssteiginum, tá Garang Koul gjørdist leysur, men Emiliano Martinez stjórbjargaði í argentinska málinum.

Argentina vann dystin 2-1 og er harvið komið víðari til fjórðingsfinalurnar. Mótstøðuliðið næsta fríggjadag er Holland, sum fyrr í dag vann 3-1 móti USA.

Argentina-Avstralia 2-1 (1-0)
1-0: Lionel Messi, 35
2-0: Julián Álvarez, 57
2-1: Enzo Fernández (sjálvmál), 77