Tær báðar Eydna J. Steinberg og Rakul Ró Steintórsdóttir duga at tekna og at finna uppá søgur. Í øllum førum, um vit skulu trúgva fleiri av teimum minstu lesararunum í Føroyum. Tvøri og Tvassa hevur leingi verið yndisbókin hjá fleiri barnagarðsbørnum, og Sólja og Súla á Sólferð kenna longu nógv skúlabørn, sum elska djórasøgur og vitan úr øllum heimsins londum.
Og hava børn, foreldur, ommur, abbar, lærarar og pedagogar spurt, nær hesar útseldu bøkur verða prentaðar av nýggjum ella um eitt stuttligt framhald er á veg, so er tímin endaliga komin.
Mikudagin 4. desember klokkan 17 á Viðareiðis skúla gerst føroyski bókabarnaheimurin eitt sindur størri, kulari og litríkari. Bjóðað verður inn til serligan jólahugna, sang og smárøður, tá tvær spildurnýggjar uppruna føroyskar barnabøkur; Tvassa og Tvøri (2arin) og Rógvi og Náttarravnur (2arin) verða lagdar fram av høvunda og teknara - og tær gomlu útgávurnar verða aftur at fáa.
Øll eru hjartaliga vælkomin.
Um tú veitst okkurt, sum VP ikki veit - skriva so til vp@vp.fo
