Føroya Arbeiðsgevarafelag sendi fyrradagin tíðindaskriv út, har tey slongdu um seg við tølum: Talvur, semingsuppskot og faldan av tímaløn + eftirløn upp í mánaðarløn, alt í einum ellibita.
Umframt eina klossuta roynd at fáa semingsuppskotið, ið tey vrakaðu, at tykjast sum teirra uppskot.
Um hetta var annað enn ein roynd at forvirra lesaran, so er hon miseydnað.
Eftir stendur, at eftir langa seming, so var hægsta boðið Vinnuhúsið kundi koma við: 4,20 kr. um tíman fyrsta árið, og 2,76 kr. seinna árið. Ella tilsamans 4,8% yvir tvey ár.
Hetta skal haldast upp ímóti einum prísvøkstri á 12% seinastu tvey árini, og at arbeiðarafeløgini hava verið meira enn rímilig til samráðingarnar í 2020 og 2022. Tí vinnan, sambært Vinnuhúsinum, stóð fyri hóttafalli orsaka av fyrst korona, og síðan krígnum í Ukraina.
Men vinnan hevur tað gott, og har er einki hóttafall. Yvirskotini eru methøg, og verkafólk vilja sjálvandi hava sín part av virðunum, ið tey skapa. Sum er kann eitt verkafólk ikki liva av síni løn.
At eftirlønin eisini er afturúrsigld, broytir ikki uppá, at eitt verkafólk ikki kemur uppá turt av lønarvøkstri á 4,8% yvir tvey ár.
Ordilig løn, tað er kravið!
Tað nýtist ikki at gerast óneyðuga fløkt!
Klaksvíkar Arbeiðskvinnufelag
Klaksvíkar Arbeiðsmannafelag
Havnar Arbeiðarafelag
Føroya Arbeiðarafelag
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo
