FBF: Í Hotel Djurhuus-deildini treingist undir toppinum, har einans trý stig eru á muni millum Fleyr á øðrumplássi og TB á fimtaplássi.

Hotel Djurhuus-deildin: Fleyr – Mjølnir 3-2 (21-25, 19-25, 30-28, 26-24, 15-7)
Á odda 2-0 í Havn lá Mjølnir væl fyri at taka annaðplássið frá Fleyr og hevði eisini dystarbóltar í bæði triðja og fjórða setti, men Fleyr kom afturíaftur og vann 3-2 og varðveitir tí annaðplássið, sum annars hevði farið til Mjølnir.

Kortini bendi lítið á, at Mjølnir skuldi fara at standa við dystarbólti í triðja setti, tá ið Fleyr hevði lagt seg á odda 10-3 í fyrsta setti. Mjølnir javnaði tó til 18-18 og fór framum og vann 25-21.

Í øðrum setti var Mjølnir á odda mest sum alt settið, sum klaksvíkingar vunnu 25-19.

Og so var tað at Mjølnir kundi havt avgjørt dystin í triðja setti við trimum dystarbóltum við støðuna 24-21 og aftur einum við støðuna 28-27, men Fleyr yvirlivdi aftur og vann næstu tríggjar bóltarnar og settið 30-28.

Eisini í fjórða setti hevði Mjølnir dystarbólt, men heldur ikki hesa ferð tók Mjølnir av, tá støðan var 24-23, og í staðin  vann Fleyr næstu trý stigini og settið 26-24.

Í javnbrótaranum hevði Fleyr yvirvág og fór frá 3-3 upp á 9-4, og tá megnaði Mjølnir ikki at svara aftur, og so vann Fleyr 15-7 og fekk tvey stig aftrat á stigatalvuna, har Fleyr heldur fast í annaðplássið, tvey stig frammanfyri Mjølnir og KÍF á triðjaplássi, sum aftur eru eitt stig frammanfyri TB á fimtaplássi.

Dráttur – KÍF 1-3 (20-25, 13-25, 25-19, 17-25)
Í einar tveir tímar lá KÍF ájavnt í stigum við Fleyr  á øðrumplássi eftir greiðan sigur á Drátti, sum kortini vann sítt fyrsta sett í ár. Hin trý vann KÍF uttan himpr.

Støðan í Hotel Djurhuus-deildini: