Ísrael hevur sett eitt evstamark fyri, nær seinastu gíslarnir sum Hamas tók 7. oktobur í fjør skulu vera leyslatnir. Eru allir gíslarnir ikki leysir áðrenn ramadan høgtíðin byrjar 10. mars leypur Ísrael á býin Rafah har suðri í Gaza.
- Heimurin skal vita, og leiðararnir í Hamas skulu vita, at um okkara gíslar ikki eru heima til ramadan høgtíðina, so halda bardagarnir fram allastaðni, eisini í Rafah og har á leið, segði miðsøkjandi politikarin og fyrrverandi ovastin í ísraelska herinum, Benny Gantz.
Hildið verður, at umleið 1,7 milliónir palestinar eru flýggjaðir til Rafah, og altjóða hjálparfelagsskapir halda, at tað fer at kosta nógvum flóttarfólkum lívið um Ísrael ger álvara av at fara inn í býin at kríggjast.
Um tú veitst okkurt, sum VP ikki veit - skriva so til vp@vp.fo
