Miðlahúsið: Eins og tey seinastu nógvu árini gevur Miðlahúsið út árbók, sum skjalfestir kappingarárið í fótbólti. Bókin viðger Betri-deildina hjá monnum og kvinnum, eins og profilar og stjørnuskot verða lýst hjá hvørjum einstøkum felag.

Áður hevur tað verið soleiðis, profilar og stjørnuskot bert hava verið lýstir á mannfólkasíðuni, men í ár vera profilar og stjørnuskot útnevnd á øllum kvinnuliðunum eisini.

Í ár var tað Víkingur, sum vann FM-heitið á mannfólkasíðuni, meðan NSÍ ikki gjørdi mætari enn at vinna greipuna á kvinnusíðuni fyri fyrstu ferð nakrantíð í søgu felagsins.

Steypakappingina hjá monnum vann HB – hetta var steypasigur nummar 30 hjá mest vinnandi liðnum í føroyskum fótbólti.

Afturat tí er ein rundferð á skránni, har feløgini, sum eru uttan fyri tí bestu føroysku deildina, eru umrødd.

Harafturat er drúgv viðgerð av landsliðsárunum hjá monnum og kvinnum – bæði, tá talan er um vaksnamannalandslið, og eisini um ungdómslandslið

Til seinast vera avrikini hjá føroysku feløgunum í altjóða fótbólti eisini skjalfest. Í ár var einki føroyskt lið, sum kom í bólkaspæl, men KÍ var bert minuttir frá at enda í altjóða bólkaspæli annað árið á rað. Alt koppaði tó á høvdið í yvirtíðini í finska høvuðsstaðnum, Helsinki.

Miðlahúsið ger sum heild altíð nógv burturúr føroyskum fótbólti, og tilfarið úr bókini er fingið til vega úr tilfari, sum Miðlahúsið hevur framleitt gjøgnum árið.

Góðan lesihug.