Fjarhitafelagið: Fjarhitin sleppur heldur ikki undan inflatónini, tískil hevur nevndin í Fjarhitafelagnum samtykt at hækka prísin fyri fjarhita frá 1. januar 2024.

Fjarhitin skal hvíla í sær sjálvum, og tí er neyðugt, at samsvar er ímillum raksturin og rentu- og prísstøðið sum heild, ið er hækkað munandi seinasta árið. Tað hevur við sær, at eitt miðal húsarhald kann vænta, at rokningin fyri fjarhita hækkar umleið 200 krónur um mánaðin í 2024.

Fjarhitakundarnir eru býttir í tríggjar prísbólkar. Í Bólki 1 eru íbúðir, raðhús og sethús, í Bólki 2 eru t.d. smá og miðalstór virki, og Bólkur 3 fevnir um stórar bygningar sum eitt nú gistingarhúsini og svimjihylin.

Í Bólki 1 hækkar prísurin 12 oyru – úr 0,68 kr./kWt upp í 0,80 kr./kWt. Prísurin í Bólki 2 økist 13 oyru – úr 0,66 kr./kWt upp í 0,79 kr./kWt. Í Bólki 3 hækkar prísurin 15 oyru – úr 0,60 kr./kWt upp í 0,75 kr./kWt. Prísirnir eru uttan MVG.

Prísskipanin, sum áður fylgdi oljuprísinum, er grundað á eina meginreglu um, at raksturin skal hvíla í sær sjálvum, og tað hevur í hesum føri við sær, at prísurin skal ásetast í samsvari við økta rentu- og kostnaðarstøðið. Tí hækkar prísurin nú.

Fjarhitafelagið hevur seinnu árini miðvíst breitt fjarhitanetið út í høvuðsstaðnum. Síðsta stigið í hesum útbyggingum er at binda Kongavarða á Argjum í høvuðsnetið, sum tá strekkir seg 14 kilometrar frá Sundsverkinum og út á Kongavarða.

Umleið 1800 brúkarar eru bundnir í fjarhitaskipanina.