Tríggir menn vóru inni í Leigubúðini. Hann, sum sat á einum krakki upp ímóti vegginum, var syndarligur á at líta. Ikki tí hann kropsliga var visaligur, tvørturímóti var hann bæði høgur og vællimaður og í mesta lagi farin um tey tretivu. Hann var dimmholdaður við krunkasvørtum hálvlongum hári. Høgra eyga var eisini myrkt sum eitt kolastykki, og tað tyktist at brenna ein eldur í tí. Har vinstra eygað hevði verið var nú bara eitt bløðandi hol.
Altartalvan Tann heilaga Kvøldmáltíðin frá 1647 hvørvur úr Havnar Kirkju, meðan ramman stendur eftir. Á baksíðuni á hesari er ein gamal skurður inn í viðin, IHS. Hevur tað samband við vitjan av einum jesuitti í 1600-talinum? Tá ið danski stjórin á Listasavninum stutt seinni verður funnin krossfestur á norðurbróstinum í kirkjuni, tysja spurningarnir fram. Hannis Martinsson við sínum trúgvu hjálparmonnum Edmundi West og Haraldi í Sátudali royna at fáa skil á fløkjuni.
ALTARTALVAN er framleidd á Føroyaprenti, er 279 bls. og kostar kr. 299.
Um tú veitst okkurt, sum VP ikki veit - skriva so til vp@vp.fo
