![](https://www.vp.fo/fileadmin/_processed_/e/3/csm_Johanna-a-Bergi_03_458a2c36a5.jpg)
![](https://www.vp.fo/fileadmin/_processed_/e/3/csm_Johanna-a-Bergi_03_458a2c36a5.jpg)
- Radarin hjá Atlantic Airways, sum var umrøddur í Degi og Viku fríggjakvøldið, er fyrst og fremst ætlaður at økja tryggleikan, tá tyrlurnar verða kallaðar út til bjargingarátøk í illveðri. Tí eigur hvørki rutuflúgvingin hjá flogførum ella tyrlum at knýtast upp í hetta málið, sigur Jóhanna á Bergi, stjóri.
- Atlantic Airways hevur keypt ein radara, sum skal økja um trygdina, tá tyrlurnar verða kallaðar út til bjargingarátøk í ringum veðri.
- Hesin radarin var umrøddur í einum innslagi í Degi og Viku fríggjakvøldið 12. oktober kl. 19.00, men innslagið hevur tíverri elvt til nakrar misskiljingar, sum Atlantic Airways við hesum loyvir sær at rætta.
- Innslagið tekur støði í einari frágreiðing frá veðurmenningarbólkinum, har radarin verður umrøddur.
- Tíverri kemur ikki greitt fram í innslagnum, at radarin er ætlaður at økja um trygdina, tá ið tyrlurnar skulu út í bjargingarørindum.
- Innslagið gevur ístaðin ta fatan, at tørvur er á radaranum til rutu-flúgvingina hjá bæði flogførum og tyrlum. Hetta er skeivt, tí øll rutuflúgving bæði við tyrlum og flogførum verður avlýst, tá ivaveður er.
- Hinvegin verður meira lagt fyri við tyrlunum í bjargingarátøkum, og tá er umrøddi radarin eitt gott tól at økja um trygdina hjá bjargingartyrlunum, sigur stjórin.
Um tú veitst okkurt, sum VP ikki veit - skriva so til vp@vp.fo