Hesa vikuna kemur danski prædikumaðurin, Hans Berntsen aftur til Føroyar. Hesar komandi dagarnar fer hann at hava frelsu- og grøðingarmøtir kring oyggjarnar.

Hans Berntsen var her í mars mánaði í ár, har túsundtals fólk nýttu høvið at lurta eftir boðskapi hansara um Jesus – á Viðareiði, har tað búgva 350 fólk, vóru eini 250 fólk til møtið, og í KFUM&K í Klaksvík, har helst eini 600 fólk vóru á møti.

Øll hesi fólkini fingu høvið at síggja – ella sjálvi uppliva – at menniskju vórðu bæði frelst og grødd fyri sjúkur og plágur av ymiskum slagi.

Í vár var so avtalað, at Hans skuldi koma aftur til Føroyar í august, og nú fer hann at tala í Suðuroy, Norðoyggjum, í Eysturoynni og í Havn.

SIGA JA TIL JESUS
Hans Berntsen er ikki bundin at nakrari kirkju ella samkomu, og talar tí allastaðni, har hann verður boðin.

Á hesum sinni verður høvið at fara á møti hjá honum eftir hesi skrá:
Mikukvøldið: í Suðuroy
Hóskvøldið kl. 19: í skúlanum á Viðareiði
Fríggjakvøldið kl. 19: í KFUM&K í Klaksvík
Leygarkvøldið kl. 19: í missiónshúsinum í Leirvík
Sunnudagin kl. 11 í Lívdini í Hoyvík og kl. 19 í Oasuni í Hoyvík.

Hans Berntsen kemur til Føroyar eftir eina vitjan í Bykirken í danska býnum Odense um vikuskiftið, har eini 100 fólk vóru á møti. Av hesum søgdu 23 teirra ja til at fylgjast við Jesusi og nýggja lívinum at fylgjast við honum.

- Tað er altíð trúarstyrkjandi at vera við til møtini hjá Hans Berntsen, og síggja, hvat Gud kann gera her í okkara tíð.