Duravørðarnir høvdu sum heild síni viðurskifti í ordan. Tað vísti eitt átak, sum politiið hevði síðstu nátt, tá tey vóru runt og spurdu eftir prógvunum hjá teimum sum ansaðu eftir hurðini í fleiri skeinkistøðum.

- Onkur manglaði at fáa tað seinasta uppá pláss, manglaði okkurt skeið kanska, men sum heild vóru tingini í lagi, sigur vakthavandi á politistøðini.

Tað krevst prógv um tú skalt vera duravørður í Føroyum. Kunngerðin var lýst við ársbyrjan 2020. Tankin aftanfyri lógina sum kom í gildi í 2019 er, at duravørðar arbeiða í einum umhvørvi, har tað koma nógv fólk, eisini heilt ung fólk, sum hava drukkið, og tí er serligur tørvur á at tryggja, at tey fólkini, sum arbeiða í umhvørvinum, eru skikkað og ábyrgdarfull.

Ein duravørður skal eitt nú hava skeið í fyrstuhjálp og skeið í eldsløkking. Hann ella hon skal eisini kenna væl ásetingarnar í rúsdrekkalógini eins og kenna hølini væl, har viðkomandi arbeiðir, eitt nú rýmingarleiðirnar. Ein duravørður skal eisini bera týðuligt frámerki sum vísir, at hann er duravørður.