Føroyar lesa hava verið á gátt í Kvinnuhúsinum. Endamálið var at lata Kvinnuhúsinum eitt úrval av bókum til kvinnur og børn, sum gista á Kvinnuhúsinum.

Kvinnuhúsið hýsir á hvørjum ári umleið 12 kvinnum og 11 børnum, sum kunnu vera búgvandi upp til seks mánaðir. Tí hevur Føroyar lesa gjørt av at lata Kvinnuhúsinum eitt úrval av bókum at stytta sær um stundir við. Hóast Kvinnuhúsið fær nógva hjálp frá hjálparfelagsskapum og stovnum, kemur tað væl við at bókahillarnar fáa eina innspræning av nýggjum og viðkomandi bókum.

- Vit eru fegin um alla ta hjálp, vit fáa. Í seinastuni hava vit tó saknað nýggjari og meira viðkomandi bøkur til kvinnur og børn, ið gista hjá okkum. Tí koma hesar bøkurnar sera væl við, og tær eru væl móttiknar. Serliga væl umtókt er myndabókin Mín fyrsti bóndagarður, sigur Frida Jóanesarson Dam, ráðgevi í Kvinnuhúsinum.

Les eisini: Bøkur til barnadeildina 

Hon greiðir frá, at tað fyrst og fremst eru kvinnur, ið leita sær á Kvinnuhúsið, men at tað javnan eru børn við.

- Tey størru børnini sita ofta og lesa sjálvi, men vit starvsfólk lesa eisini saman við teimum smáu. Okkara uppgáva er at vera saman við mammuni um børnini. Og her kann bókin vera ein stór hjálp til at skapa samband við børnini. Og so er tað at lesa eisini týdningarmikið fyri at venja orð og at seta orð á myndir.

Tað er ikki ein sjálvfylgja, at børnini hava góðar førleikar í føroyskum, tí ein partur av kvinnunum, ið leita sær hjálp á Kvinnuhúsinum, eru útlendskar kvinnur. Tí er bókapakkin frá Føroyar lesa samansettur av bókum til fleiri aldursbólkar. Til børnini er eitt úrval av myndabøkum og søgum til børn, sum kunnu tillagast aldri og málførleika. Til kvinnurnar eru skaldsøgur og bindibøkur at finna í bókapakkanum.

Les eisini: Lesið við børnunum

- Tíðin kann fella teimum long, meðan tær búgva á Kvinnuhúsinum og bíða eftir at finna annan bústað, og tann tíðin fer ofta við at lesa bløð og bøkur. Tí er gott við einum størri úrvali at bókum at velja í.

Tað eru Bókadeild Føroya Lærarafelags og Sprotin, ið hava latið bøkurnar til Kvinnuhúsið.

Á Kvinnuhúsinum starvast trý starvsfólk í føstum starvi. Harumframt eru 35 sjálvbodnar kvinnur knýttar at Kvinnuhúsinum.