Steypakappingin, kvinnur, bólkur 1:
Fleyr – KÍF 3-2 (20-25, 23-25, 25-21, 25-9, 15-13)

Kollfirðingar iðra seg um, at trý stig ikki vóru fingin til høldar ímóti verandi steypavinnaranum, Fleyr, eftir at hava vunnið tvey tey fyrstu settini og verið á odda 20-18 í triðja setti. Fleyr javnaði tó til 20-20 – og sjálvur Messi hevði verið errin av tí eina bóltinum, sum Fleyr fekk bjargað stiginum við, tá fóturin varð tikið í brúk í neyðstøðuni. Fleyr vann síðani 25-21.

Í fjórða setti tóktist sum um, at luftin var farin úr KÍF-ballónini, og Fleyr vann lættliga 25-9.

KÍF kom tó fyri seg aftur í javnbrótaranum og legði seg á odda 7-4, men eftir fýra servur frá Iuliiu Kuvshinova var Fleyr aftur á odda 9-7. KÍF javnaði tó til bæði 10-10 og 11-11, men so vann Fleyr næstu fýra bóltarnar, og tann seinasta smassjaði Iuliia í gólvið til 15-11.

Eina stigið, sum KÍF fær burtur úr 3-2 tapinum, er kortini ikki virðisleyst, tí vinnur KÍF trý stig ímóti TB næsta sunnudag, so er hálvfinaluplássið tryggjað. Øll onnur úrslit merkja, at avgerðin um hvør kemur í hálvfinaluna, fellur í dystinum millum Fleyr og TB 21. januar.
 

Mjølnir kom afturíaftur

Steypakappingin, kvinnur, bólkur 2:
Dráttur – Mjølnir 0-3 (22-25, 25-27, 22-25)

Mikukvølduið fóru Mjølnir-kvinnurnar vónbrotnar av vølli, tá tær høvdu tapt 3-2 fyri Ternuni, eftir at hava verið á odda 2-0 og havt dystarbólt í triðja setti. Í dag vóru bert smíl at síggja – ikki minst eftir annað sett, har Mjølnir hevði verið aftanfyri 20-13, men kortini megnaði at koma afturíaftur og vinna settið 27-25!

Í triðja setti var Mjølnir greitt á odda 23-18, men Dráttur mundi fingið um endan aftur, og stríddi seg upp á 22-23. Men so táttaði Mjølnir í aftur, og síðsta bóltin fekk Dráttur ikki yvir um blokkin við Annu Arnholdsdóttir á odda, og so vann Dráttur 25-22 og dystin 3-0.

Harvið er Mjølnir brádliga væl við aftur í kappingini um at sleppa í hálvfinaluna. Dysturin ímillum Drátt og Ternuna næsta leygardag kann væl vísa seg at fara at gerast avgerandi fyri, hvørt tað verður Ternan ella Dráttur, sum vinnur seg í hálvfinaluna. Hóast SÍ ongan dyst hevur spælt enn, so fer tað at koma óvart á, um SÍ ikki verður annað av liðunum í bólki 2, sum vinnur sær sæti í hálvfinaluni.

Fimmsettarin koppaði til SÍ

Steypakappingin, menn:
ÍF – SÍ 2-3 (25-15, 23-25, 25-19, 22-25, 14-16)

Eftir at ÍF hevði vundið burturúr SÍ í fyrsta setti, sum endaði 25-15, var einki sum bendi á, at hetta skuldi gerast til enn ein 5-settara.

Men SÍ javnaði til 1-1 í settum, áðrenn ÍF aftur vann triðja sett við greiðum muni. Sørvingarnir javnaðu tó aftur til 2-2, og so skuldi tað avgerast í javnbrótaranum.

Her kom tað illa við hjá ÍF, at Filip Ilic, sum hevði verið eyðsýndur løtuna áðrenn, mest sum beinan veg meiðslaði seg í lendingini, eftir ein tvídyst frammi við netið. ÍF legði seg tó á odda 5-2 og 8-5. SÍ javnaði til 10-10, men ÍF vann sær tríggjar dystarbóltar við støðuna 14-11. Men allir vórðu misnýttir, og við m.a. pannukøku fekk SÍ alt uppaftur hesa løtuna og vann sær sjálvum dystarbólt við støðna 15-14. Heldur ikki hesa ferð fekk ÍF smassjini í gólvið, og so vann SÍ net-duellina og javnbrótaran 16-14.

Leygardagin vunnu menninir hjá Fleyr tryggan 3-0 sigur á Ternuni við settúrslitunum 25-15, 25-15, 25-13.